Entertainment News
സിനിമാലോകം ഏറെ പ്രതീക്ഷയോടെ കാത്തിരുന്ന രജനികാന്ത് ചിത്രം 'ജയിലര്‍ 2' തിയേറ്ററുകളില്‍ വലിയ വിജയമായി മുന്നേറുകയാണ്. ബോക്‌സ് ഓഫീസില്‍ കോടികള്‍ വാരികൂട്ടുമ്പോഴും ചിത്രം വലിയ വിവാദങ്ങളിലൂടെയാണ് കടന്നുപോകുന്നത്. ചിത്രത്തില്‍ മോഹന്‍ലാലിന്റെ പ്രധാനപ്പെട്ട രംഗങ്ങള്‍ വെട്ടിമാറ്റിയെന്നാരോപിച്ച് അദ്ദേഹത്തിന്റെ ആരാധകര്‍ രംഗത്തെത്തിയിട്ടുണ്ട്.
മോഹന്‍ലാലിന് പകരം ഡ്യൂപ്പിനെ വെച്ചാണ് ചില രംഗങ്ങള്‍ ചിത്രീകരിച്ചതെന്നും ആരാധകര്‍ വിമര്‍ശിക്കുന്നു. ട്രെയിലറിലുണ്ടായിരുന്ന പല മികച്ച രംഗങ്ങളും സിനിമയില്‍ കാണാനില്ലെന്ന പരാതിയും ശക്തമാണ്. ഇതിനിടയില്‍ ചിത്രത്തിന്റെ ക്ലൈമാക്‌സില്‍ മോഹന്‍ലാലിന് പകരം ഡ്യൂപ്പാണ് അഭിനയിച്ചതെന്ന റിപ്പോര്‍ട്ടുകളും പുറത്തുവന്നു. സംവിധായകന്‍ നെല്‍സണെതിരെ സോഷ്യല്‍ മീഡിയയില്‍ വലിയ പ്രതിഷേധമാണ് മോഹന്‍ലാല്‍ ആരാധകര്‍ ഉയര്‍ത്തുന്നത്.
ഈ വിവാദങ്ങള്‍ക്കിടയിലാണ് ചിത്രത്തിന്റെ ആക്ഷന്‍ കൊറിയോഗ്രാഫര്‍ ചേതന്‍ ഡിസൂസയുടെ പ്രതികരണം പുറത്തുവന്നത്. സിനിമയിലെ കാര്‍ സീനില്‍ അഭിനയിച്ചത് മോഹന്‍ലാല്‍ തന്നെയാണോ അതോ ഡ്യൂപ്പാണോ എന്ന് ഒരു ആരാധകൻ സോഷ്യൽ മീഡിയയിലൂടെ ചോദിച്ചിരുന്നു. ആ ചോദ്യത്തിന് "അത് അദ്ദേഹം തന്നെയാണെന്ന്" ചേതന്‍ വ്യക്തമാക്കുകയും ചെയ്തു.
എന്നാല്‍ ഈ മറുപടി സോഷ്യല്‍ മീഡിയയില്‍ വലിയ ചര്‍ച്ചയായിരിക്കുകയാണ്. ചേതന്റെ വാക്കുകളെ പിന്തുണച്ച് ചിലര്‍ രംഗത്തെത്തുമ്പോള്‍, ഇത് മുഖം രക്ഷിക്കാന്‍ പറയുന്നതാണെന്നും ആ സീനില്‍ ഉള്ളത് മോഹന്‍ലാല്‍ അല്ലെന്ന് വ്യക്തമാണെന്നും പറഞ്ഞ് ആരാധകരുടെ എതിര്‍പ്പ് തുടരുകയാണ്. ബോക്‌സ് ഓഫീസില്‍ ചിത്രം വന്‍ വിജയമായി മാറുമ്പോഴും, മോഹന്‍ലാല്‍ ആരാധകരുടെ ഈ അമര്‍ഷം സിനിമയ്ക്ക് തിരിച്ചടിയാകുമോ എന്നാണ് ഇപ്പോള്‍ സിനിമാലോകം ഉറ്റുനോക്കുന്നത്.